Mar 7 | SBE | STEP | Paliseya tamowaidi yo taulauhekata hekadi Yelusalema unai se laoma, se lagegogoma Yesu unai.

a(Aisaiya 29:13)

b(Esodo 20: 12)

c(Lewitika 20: 9)

Mark 7

Kulutubu laugagayodi lauwatanina unai tamowai Yaubada yona laugagayo se utusi

(Mataiyo 15:1-9)

1 Paliseya tamowaidi yo taulauhekata hekadi Yelusalema unai se laoma, se lagegogoma Yesu unai. 2 Yona hekahekatao hekadi se kitadi se kaikai, na nige se nimadeuli doha kadi kulutubu yodi kabikabi mamohoina unai. 3 Paliseya tamowaidi yo Dius tamowaidi maudoidi kadi kulutubu miyamiyadi se hekasisiyedi, unai taba nige se kaikai kana siga nimadi se deulidi doha kulutubu yodi kabikabi mamohoina unai. 4 Ena yodi kaba lokulokune unai se uyoma, se nimadeuli baguna na kabo se kaikai. Kulutubu yodi kabikabi yo laugagayo se bado bena se hekasisiyedi. Hinage kabikabi hekadi doha keyaka yo waila kabayaiyai yo gulewa deudeulidi udiyedi.

5 Unai Paliseya tamowaidi yo laugagayo taulauhekata Yesu se henamai se wane, “Idohagi to kowa yom hekahekatao kulutubu miyamiyadi nige se miyawatanidi, na ma nima bikibikidi se kaikai?” 6 Yesu ye hededelau udiyedi ye wane, “Komiu taukailupolupo, Aisaiya peloweta kami hedehedede ye hededehemasalaha wa mamohoi komiu taukailupolupo doha ye kuliyako ye wane,

‘Siya kawadi unai mo se hedebasaegau, na nuwadi unai se lausuwalaegau.
7 Siya yodi hedebasaegau nige kaniyona, matawuwuna tamowai yodi laugagayo mo se hekahekatadi.’ ^a
8 Yaubada yona laugagayo kwa tolehesuwaladi, na tamowai yodi laugagayo kwa kabihekahinidi.”

9 Na kabo ye wane, “Komiu laugagayo tolebuina unai kwa kata kalili ede Yaubada yona laugagayo kwa tolehesuwala na komiu yomiu kwa lauwatani. 10 Mose ye hededeyako ye wane,

‘Tamam yo sinam ku hekasisiyeidi’ ^b
yo ye wane,

‘Ena hesau tamana yo sinana ye hededeheyababadi, iya kabo se unuhemwaloi.’ ^c
11 Na komiu yomi laugagayo doha teina: Ena tamowai hesau sinana yo tamana yodi kainauya ye nonohai na nige ye mosei udiyedi na ye mosei Yaubada unai, 12 kwa hedede temeta laulau ne bena ye dudulai. 13 Komiu yomi laugagayo kwa lauwatani, unai Yaubada yona laugagayo kwa tolehesuwala. Yo hinage Yaubada yona laugagayo hekadi kwa tolebuidi gonogonowana doha teina.”

Ginauli sahasahadi tamowai se hebiki

(Mataiyo 15:10-20)

14 Na kabo tamowai maudoidi wa ye yoganedi se laoma iya unai, na ye hededelau udiyedi ye wane, “Komiu maudoimiu yogu hedehedede kwa lapu namwanamwaei yo bena kwa nuwatulobai. 15 Tamowai saha ye kai na ye dobi bogana luwana wai meta nige ye hebiki Yaubada matana wai. Na ginauli saha nuwana wai ye pesama meta iya ye hebiki ede.” ^{▼▼7:16 Kulikuli beyabeyadi hekadi lausoisoi 16 hinage se kuli doha teina:‘Ena hesau beyana udiyedi ye lapui bena ye lapulapui namwanamwaei.’}

17 Yesu maiyana hekahekatao se mwalaesae numakalo wai, na kabo palabole kaniyona wa se henamaiyei. 18 Iya ye hededelau udiyedi ye wane, “Idohagi to nige kwa nuwatulobai? Komiu taba kabina kwa kata saha tamowai ye kai na ye dobi bogana luwana wai nige ye hebiki. 19 Kana kao ede nige ye dobi nuwana unai, na ye dobi bogana luwana wai, na kabo ye miyagabaei.” (Teina hedehedede ta unai Yesu ye hedede gabaei meta kai maudoidi se aꞌa.) 20 Yo ye wane, “Na saha tamowai nuwana wai ye pesama meta iya ye hebiki ede, 21 matawuwuna saha nuwana wai se pesama wa siya ede teina: nuwatu biki, sikalakumiyai ^{▼▼7:21 Sikalakumiyai meta Saliba kalinana beyabeyana hesau, kaniyona ede: Tau yo sine nige se tawasola na yababa se ginauli.}, kaiwahali, kaiunu, 22 ganawali, samagogo, henunu, kailupolupo, matabado, kaikalomagigili, monunu, nuwasaesae, yo walobayao. 23 Teina ginauli yabayababadi maudoidi ne meta tamowai nuwana unai se laoma yo siya tauhebikina ede Yaubada matana unai.”

Dagela waihiuna yona sunuma

(Mataiyo 15:21-28)

24 Temenai kabo Yesu ye lau Taiya yo Sidona ^{▼▼7:24Loma tamowaidiyao Penesiya se laugilihai, unai ye laoma Siliya tehana. Taiya yo Sidona meta siya magai lakilaki kalilidi labui Penesiya yona teha unai. Kulikuli beyabeyadi hekadi magai Sidonanige se katai lausoisoi ta unai.} tehana ne unai. Na ye mwalaesae numa hesau kalona unai. Yona nuwatu meta bena tabu iya se kita. Na iyamo nige gonowana ye tauwadam.

25 Waihiu hesau natuna sinekuku. Yaluwa yababana ye luwu iya unai. Na waihiu wa Yesu wasana ye lapui ede ye laoma ye tulibono iya talanuwana unai. 26 Waihiu wa dagela waihiuna Siliya tehana tupwa Penesiya unai ye laoma, na ye kaibwada Yesu unai taba yaluwa yababana natuna unai ne ye hedede hepesa. 27 Na Yesu ye hededelau iya unai ye wane, “Sola wawayao ya hekai bagunaidi. Tabu wawayao kadi kai ya gabalae kedewa ^{▼▼7:27Hedehedede ta unai meta Dius tamowaidi siya ede wawayao. Siya se nuwatui uyoidi bena se namwa, na kabo dagela tamowaidi. Unai huya hekadi se kataidi ‘kedewa nukula’.} udiyedi, temeta nige ye namwa.” 28 Waihiu wa ye hededebui ye wane, “Guiyau, mamohoi! Na iyamo wawayao saha se kaidi na mapuladi se bekudobi hatahata gunina ne unai meta kedewa kabo se kaidi.” 29 Na kabo Yesu ye hededelau unai ye wane, “Ku lau yom numa. Mata wuwuna yom hededebui ye namwa kalili. Na yaluwa yabayababana wa natum ye pesagabaeyako.” 30 Unai kabo ye uyo numa, metai natuna wa ye kita ye kenokeno, na yaluwa yabayababana wa ye pesagabaeyako.

Yesu tamowai beya kolakolana yo ye unauna ye henamwanamwa

(Mataiyo 15:29-31)

31 Yesu Taiya kana sigasiga ye laugabaei, na ye lau Sidona, na kabo ye lau Dekapoli koyana unai, kabo ye lage Galili Gabwana unai. 32 Temenai tamowai beya kolakolana yo ye unauna se woyaiyama Yesu unai. Na se kaibwada Yesu unai bena nimana ye tolesae iya unai. 33 Boda wa luwadi yena Yesu tamowai wa ye woya hesuwala. Iya ye kabilau beyana duhadi udiyedi, ye kaiso nimana unai na ye kabilau memenana unai. 34 Yesu ye kitasae galewa unai na katekamkamna nuwana ye hemwayau, na ye hededelau iya unai ye wane, “Epata” ^{▼▼7:34 Teina hedehedede ta meta kalina Alamaiki, iya Yesu kalinana.}, kaniyona ede, “Ku malapai.” 35 Mahanana ne unai beyana se malapai, yo hinage ye hedehedede. 36 Yesu boda wa ye guguyaidi na yona hedehedede ye laubodai uyoi bena tabu se hedehedede hemasalaha. Iyamo nige se nuwatui, na wasana wa kabo se helaki. 37 Siya se noko kalili se wane, “Ginauli maudoidi ye ginaulidi meta se namwa. Tamowai beya kolakoladi ye hemalapaidi, yo tamowai unaunadi memenadi ye henamwanamwadi.”